இந்த (நவம்பர்) மாத அவள் கிச்சன் இதழில்...

பருமனுக்கும் நீரிழிவுக்கும் அரிசிதான் காரணம் என்கிற கருத்தை நீங்கள் ஏற்கிறீர்களா?

மூத்த உணவியல் நிபுணர் தாரிணி கிருஷ்ணன் பதில்:

ஏற்க மாட்டேன். அரிசி உடலுக்குப் போதிய ஆற்றலையும் வலிமையையும் தரக்கூடிய அற்புத உணவு. வெள்ளை, பழுப்பு, மஞ்சள், சிவப்பு எனப் பல நிறங்களில் அரிசி உற்பத்தி செய்யப்பட்டாலும், நம் நாட்டில் வெள்ளை அரிசி, பழுப்பு அரிசி, சிவப்பு அரிசி போன்றவையே பிரதானம். ஆனால், இந்தத் தலைமுறையினர் அரிசி பளிச்சென வெள்ளை நிறத்தில் இருக்க வேண்டும் என்று விரும்புகிறார்கள். அதனால், இப்போதெல்லாம் பாலிஷ் செய்யப்பட்ட அரிசிகளைத்தான் பயன்படுத்துகிறோம்.
அரிசியை பாலிஷ் செய்யும்போதே, அதிலுள்ள நார்ச்சத்து, வைட்டமின், மாங்கனீஸ், பாஸ்பரஸ், இரும்புச்சத்து, கொழுப்பு அமிலங்கள் உள்ளிட்ட எல்லா சத்துகளும் நீக்கப்பட்டுவிடுகின்றன. அரிசியை வெறும் கார்போஹைட்ரேட் உள்ள உணவாக மாற்றியதும், உடலுழைப்புக்கேற்ப உணவை உட்கொள்ளாததுமே அந்த வகையான பிரச்னைகளுக்குக் காரணம். அதேநேரத்தில், அரிசியில் சில அத்தியாவசிய சத்துகள் இல்லை. எனவே, காய்கறிகள், பழங்கள், அசைவ உணவுகளைச் சேர்த்துக்கொள்கிறோம்.